سياسة الخصوصية

• الكلام اللي بتكتبه — الحكاية والتفاصيل اللي بتديها عشان نبني منها الصفحة، والاسم اللي بتنادي بيه الشخص واسمك إنت.
• الصور اللي بترفعها.
• تسجيل صوتي لو سجلت واحد — لحد ٣٠ ثانية، بيتخزن زي الصور بالظبط. لو حطيت لينك أغنية بدل التسجيل، إحنا مش بنخزن حاجة — اللينك بس هو اللي بيتحفظ.
• إيميلك — لو كتبته، عشان نبعتلك اللينك ونعرّفك أول ما الصفحة تتفتح، ولو حد طلب مساعدة عشان يفتحها. ولو المناسبة بتتكرر (عيد ميلاد، ذكرى، رمضان والعيد) بنبعتلك رسالة واحدة بعد سنة تفكّرك بيها، فيها كود خصم — مرة واحدة وخلاص.
• إيميل «كمّل بعدين» — لو سيبته وإنت بتعمل الصفحة، بنستخدمه في تلات حاجات بس: نبعتلك لينك ترجع بيه للي كتبته، وأكتر من كده تذكيرين لو سيبت الصفحة من غير ما تخلّصها، وبنحطّه جاهز في خانة الإيميل وقت الدفع عشان متكتبهوش تاني. مش بيتبعت لميتا ولا لأي حد من الخطوة دي — لو كمّلت لخطوة الدفع بيه، ساعتها بيتعامل زي أي إيميل دفع (شوف تحت). بعد التذكير التاني مش بنبعت تاني. مفيش نشرة ومفيش عروض، ومش بيتباع ولا بيتبعت لحد. في كل رسالة فيه لينك «مش عايز رسايل تانية»، وبنمسح الإيميل لوحدنا بعد تلات أيام لو الصفحة فضلت مخلّصتش.
• التخمينات الغلط اللي بيجربها الشخص وهو بيحاول يفتح — دي بتظهرلك إنت في صفحة المتابعة.
• لحد أنهي خطوة وصلت وإنت بتعمل الصفحة، ولو فتحت الصفحة الرئيسية أو المثال — عدّاد بس، عشان نعرف الناس بتقف فين ونصلحه. من غير IP، ومن غير نوع الجهاز غير كلمة واحدة (إنستجرام، فيسبوك، آيفون، أندرويد)، ومربوط بنفس الكوكي المجهول اللي المسودة محفوظة تحته.

• بنشيل بيانات المكان من الصور قبل ما ترفع أصلاً. الصورة بتتعاد كتابتها على موبايلك، فبيانات الـ GPS والكاميرا بتتشال ومبتوصلناش خالص.
• السر بيتخزن بعيد عن الصفحة — في جدول منفصل خالص، ومبيتبعتش للمتصفح أبداً. اللي بيفتح الصفحة مش موجود جوه الصفحة.
• عناوين الـ IP بتتشفّر قبل ما تتخزن. بنستخدمها عشان نمنع الاستخدام الآلي بس، ومش محتاجين نعرف مين فتح صفحة مين.
• الصور بتتعرض بلينكات مؤقتة بتنتهي بعد ساعة، مش لينكات عامة تفضل شغالة للأبد.

صفحتك مش مفهرسة في جوجل ومش معروضة في أي مكان على الموقع. اللينك خاص — أي حد معاه يقدر يحاول يفتحها، فمتنشروش في مكان عام.

إحنا بنشوف بياناتك بس لما نحتاج: مراجعة إيصال دفع، أو بلاغ عن صفحة، أو لو طلبت مساعدة بنفسك.

لو حطيت لينك أغنية من سبوتيفاي أو أبل ميوزيك أو أنغامي أو ساوند كلاود، الشخص اللي بيفتح الصفحة بيشغّل مشغّل الأغنية بتاع الموقع ده نفسه — يعني بيوصله طلب من جهازه هو، زي أي مشغّل أغاني متضمّن في أي موقع تاني.

بنمرر بياناتك للخدمات دي عشان الموقع يشتغل، ومش بنبيعها لحد أبداً:

• Vercel — تشغيل الموقع
• Supabase — قاعدة البيانات
• Cloudflare R2 — تخزين الصور
• Anthropic — كتابة الصفحة من الكلام اللي كتبته، ومراجعة المحتوى
• Resend — الإيميلات (لو مفعّل)
• EasyKash — استقبال الدفع (بيوصلهم اسمك وإيميلك ورقم موبايلك)
• Meta — قياس إعلاناتنا. بيتحط كوكي على متصفحك، وبنبعتلهم إيميلك ورقم موبايلك مشفّرين عشان يعرفوا الإعلان اشتغل ولا لأ. إحنا مش بنبعتلهم عنوان الـIP بتاعك من عندنا — بس كود ميتا نفسه بيشتغل جوه متصفحك على صفحات البيع، وأي حاجة بتتحمّل من عندهم بتوصلهم الـIP لوحده. ده بيحصل مع أي موقع فيه كود زيه، ومش في إيدينا نمنعه من غير ما نشيل قياس الإعلانات كله.

مفيش أي حاجة من محتوى الصفحة نفسها — لا كلامك، ولا صورك، ولا سؤال القفل ولا إجابته — بتوصل لميتا أو لأي شبكة إعلانات.

الصفحة وصورها بيفضلوا طول ما اللينك شغال. أول ما تمسح الصفحة، بتتوقف على طول، وعندك ٢٤ ساعة ترجع فيها قبل ما تتشال نهائي.

الكلام اللي كتبته عشان نعملك الصفحة بنحتفظ بيه أسبوعين بس من يوم الشراء، عشان لو حبيت تعدّل حاجة. بعد كده بيتمسح لوحده، وساعتها التعديل مبقاش متاح.

تقدر تمسح أي صفحة عملتها في أي وقت من صفحة المتابعة. ولو في صفحة عنك إنت ومش عايزها، بلّغ من هنا — بتتوقف فوراً من غير ما نطلب منك تثبت أي حاجة.

كلمنا على واتساب